Бэрс Финанс ББСБ ХХК (цаашид “Бэрс Финанс ББСБ”, “Компани” гэх) нь 2017.05.18-ны өдрийн 4115 тоот шийдвэрээр Монгол Улсын хууль тогтоомжийн дагуу “Бэрс Финанс ББСБ” ХХК (Улсын бүртгэлийн гэрчилгээ No9015005096, регистрийн дугаар 6186858) нэртэйгээр үүсгэн байгуулагдсан.
• Иргэд, аж ахуйн нэгжүүдэд бизнесийн болон хэрэглээний зээл олгох, итгэлцлийн үйлчилгээ үзүүлэх чиглэлээр олон жил амжилттай ажилласан туршлагатай;
• Өөрийн хөрөнгийн чадавх өндөр, санхүүжих өрийн хэрэгслийн төрөлжилт сайн, гадаад болон дотоодын зах зээлээс эх үүсвэр татсан туршлагатай.
• Өмнө нь олон бондуудыг амжилттай татаж, эргэн төлөлт хийсэн туршлагатай, санхүүгийн салбар болон хөрөнгө оруулагчид дунд нэр хүнд өндөртэй.
• Байгууллагын тогтвортой өсөлттэй бөгөөд 19 аймагт 20 салбартайгаар орон нутгийн иргэдийн санхүүгийн бүтээгдэхүүний хэрэгцээг хангаж ажиллаж байна.
• Макро эдийн засгийн тодорхойгүй байдал, инфляцын дарамт, бодлогын хүүний хувь хэмжээний хэлбэлзэл нь санхүүгийн үзүүлэлт болон зээлийн чанарт сөргөөр нөлөөлж болзошгүй.
• Салбарын өрсөлдөөний эрчимжилт, зохицуулалтын өөрчлөлт нь зах зээлд өргөжин тэлэх боломж эсвэл урт хугацааны тогтвортой өсөлтийг хязгаарлаж болзошгүй.
• Эрсдэлийн удирдлага, зах зээлийн хэлбэлзлээс шалтгаалсан ашигт ажиллагааны өөрчлөлт нь санхүүгийн тогтвортой байдалд сөрөг нөлөө үзүүлж болзошгүй.
• Нэг жилийн хугацаан дахь хөрөнгийн төлбөрийн хугацаа нь эх үүсвэрийн төлбөрийн хугацаанаас урт байх нь мөнгөн урсгалд сөрөг нөлөө үзүүлж болзошгүй.
Бэрс Финанс ББСБ ХХК-ийн зээлжих зэрэглэлийн үнэлгээг гүйцэтгэхдээ компаниас бэлтгэн өгсөн үйл ажиллагааны болон санхүүгийн тайлан, мэдээ материалууд, олон нийтэд ил тавигдсан эдийн засгийн мэдээлэл, эрх бүхий зохицуулагч байгууллагуудаас гаргасан банк бус санхүүгийн салбар болон хөрөнгийн зах зээлийн албан ёсны мэдээлэл, эх сурвалжуудыг ашиглан бие даасан, хараат бус байдлаар үнэлсэн болно.
Зэрэглэл тогтоох байгууллага нь Бэрс Финанс ББСБ ХХК-иас бэлтгэн өгсөн санхүүгийн тайлан болон санхүүгийн мэдээ, тайланд аудит хийдэггүй бөгөөд тус тайланд дурдагдсан баримт материалын үнэн зөв байдлыг хариуцахгүй. Мөн үнэлгээний тайланд дурдагдсан чанарын болон тоон төсөөллүүдийн биелэлтэд баталгаа гаргахгүй болно.
Санхүүжих чадварын зэрэглэл тогтоох тайлан нь үнэт цаас худалдах, худалдан авах зөвлөмж биш юм. Зэрэглэл тогтоох байгууллага нь энэхүү тайланд дурдсан мэдээлэлд үндэслэн гуравдагч этгээдийн зээл, хөрөнгө оруулалт, бизнесийн шийдвэрийн үр дагаврыг хариуцахгүй болно.
